Posts published in “Our Stories”

Lebala ka General Bheki Cele… lebala ka maphodisa a bosetšhaba le a dimasepala… lebala ka mašole le masekurithi – lephodisa le lekaonekaone la gago ke wena! Modiro o mogolo wa batho bao ba boletšwego ke go bona gore molao o a obamelwa ka dinako tšohle… woo ke modiro wa bona. Aforika Borwa e na le badudi ba go feta 50 milione mola palo ya maphodisa le mašole ao a filwego modiro wa go hlokomela maemo a ditaba mo nakong ya lesolo la ‘dula-gona-fao’ e le ka tlase ga milione o tee. Ga go nyakege radipalopalopharephare go lemoga gore palo ya badudi e feta ya maphodisa makga a mantši kudu gore a ka kgona go hlapetša batho bohle ka dinako tšohle.

Ge ‘dula-gona-fao’ (lockdown) ye e feta, Tona ya Maphodisa, General Bheki Cele, o kotsing ya go ikhwetša e le yo mongwe wa matona a go se tume. Bothata: kgatelelo ya gagwe ya go thibela go rekišwa le go dirišwa ga bjala (dinotagi) le motsoko! Ka go thibela go rekišwa le go dirišwa ga bjala le motsoko, bontši bja mathaka (goba ke re le mathari?), a re Cele o e gatile ka moseleng! Le ge go le bjalo, bontši bo a lemoga gore yo ga se monna yo a bolelago feela eupša o na le maphodisa a mmušo le a dimasepala, mašole le borasephethephethe go phethagatša seo a se bolelago.